Tajr Tal-Karti

  Kull Meta Jmut Poeta. Tislima lil Profs. Charles Briffa+   Fis-swali fejn id-dellijiet  jimirħu l-Imgħallem reħa’ l-pinna minn idejħ u l-linka niexfa qiegħda issa ssefsef F’widnejn kull min xi darba resaaq lejħ.   Tal-ħolm, tapezzerija ħsibijietu Minsuġa f’waqt ta’ dwejjaq, f’waqt ta’ferħ, Kull kelma pinzella fuq it-tila, Ta’ qalbu tħabbat b’ritmu ssib is-serħ.   Bil-kitba tiegħi naqqax toroq ġodda Fil-mażġar u fil-wileġ mifruxin, Fejn hemm l-eroj u d-dellijiet jiżżeffnu Fiż-żifna mqaddsa tal-ispazju u ħin.   Ir-rix tat-tajr mill-ġwienaħ issa siket, Id-diwi tal-ħoss tiegħu daqs ta’ ragħaj, F’kull vers ix-xrar ta’ moħħu u ta’ ħidmietu Legat ta’mħabba u għaqal, dejjem ħaj.   Għalkemm m’għadniex interqu issa miegħu, In-nar li kebbes f’ħajtu ma jmut qatt, U ruħ’ għad’ hemm f’kull paġna illi tqalleb Sabiex minn-naħħa l-oħra jżomm kuntatt.   Ningħaqad jien ukoll mal-ilħna l-oħra Inweġġħu ’l-min b’kuraġġ ħolom bis-sħiħ, Għaliex fi kliemu stess, qatt ma...

  Fl-infern ta’ Din Id-Dinja.   Fl-infern ta’   did-diskordja Met’aħna ma naqblux Fejn dak li xtaqt il-bieraħ Għalxejn għax ma ġġibux.   Fl-infern ta’ din id-dinja Fejn nafu li m’aħniex Tistqasi x’ġara ’l-bieraħ l-imgħoddi għad m’għaddiex.   Infern fl-inkomprensjoni Sisien għoljin ta’ swar Ma baqa’ xejn xi jnebbaħ Trid toqgħod kwiet id-dar.   Alfred Grech 27/09/2024

  Ħalliha Ħa Toħroġ Weħidha.   Ħalliha ħa toħroġ weħidha Il-karba ta’ min hu maħnuq, Il-qilla ta’ min qed jintrifes, Il-għanja ta’ min hu misruq.   Ħalliha ħa torħroġ u tidwi Tal-merħla bla rgħaj  jew mexxej, l-imbe’ ta’ dal mogħoż li jirromba destinhu fuq xifer għaddej;   Tal-kotra li trid tibqa’ miexja Bla taf illi dan ħmar il-lejl, Bla tħares u taħseb dwar għada Fil-beraħ u l-wisa’ bla kejl.   Li fasslet li stess bl-għodod tagħha Li fasslu il-pseudo għorrief Li fassslu u ħolmu dil-ħrafa Fuq ċattra bla qlugfħ u moqdief.   Li ħasbu li dal-gżejjer ċkejkna Iħaddnu daqshekk barranin Mingħajr ma nitilfu mqar ruħna U l-bixra t’Għawdxin u Maltin.   Alfred Grech 25/09/2024.

  La Tistaqsix .   La tistaqsix l-imgħoddi Ħallieħ ħa jgħaddi r-riefnu Gelgul ta’ dmugħ li xxerred Inkella ssir bla mira.   La ttistaqsix fejn jonfoħ Ir-riħ tat-tqanqiliet l-orkestra qatt ma tieqaf u l-għanja li ma ktibtx.   La tistaqsix x’inhu sewwa Il-kimika li trid tħallat Biex timla’ l-baħħ ta’ ruħ U r-resħa minn tal-oqbra.   Xħin jiġi l-waqt Taħsad dal li żrajt U tibda tifhem aktar.   Alfred Grech 24/09/2024.

  198.   Kemm il-darba sibt ruħek fuq ix-xifer? U kemm il-darba ħlift li lanqas terġa’? Sakemm s’hemmhekk għad tasal lanqas demgħa Xi xxerred ma jibqagħlek. Għax tintilef U ssib li għalik lanqas post ma jifdal Jew tieħu post li huwa ta’ ħaddieħor Fil-filliera li twassal f’tarf irdumi. Jien lanqas ma ridt naqsam il-miserja Tiegħek, inkella sarli l-ħin biex nitlaq Għar ridt ninġarr mal-bqija bħal ħaddieħor Fl-istess vagun lejn l-art tal-meravilji. Int bħali taf li bqajna attakkati Ma dak li kellna nagħtu mbagħad intbaħna Li konna tifna dak li kellna nieħdu.   Alfred Grech. 22/09/2024  

  Indipendenza 2024 . Irrid ngħannilek għanja u lanqas nista’, Infakkar xtaqt ukoll jum il-ħelsien, ’Mma mnejn ser tiġi l-leħma u nibda nħarbex Jekk ġid u barka mhu qed nara mkien?   Irrid niftaħar bik ja Malta tiegħi, Inxandar l-isem tiegħek ma kulħadd, ’Mma kif se nqawwi qalbi, mnejn il-ħila Jekk dak li sal-lum bnejna qed jinħatt?   Min tassew jista’ jgħid li għadek ħielsa Jekk l-alla tiegħek issa saru l-flus, Bl-iskuża tat-tkabbir fl-ekonomija Spiċċajt iddur bħal rota mingħajr fus?   Biegħet ġismek u tajt ruħħek lill-barrani, Tmejjilt quddiem il-kbir, quddiem il-għani.   Alfred Grech 21/09/2024

  197 .   Kull meta tqum filgħodu trid ittajjar Il-ħolm u l-ħmar il-lejl li fih kont miexi, Imqar xħin tmut, bi stil trid tħalli l-ħajja Għanja bir-ritornell u bla kuda, Inkella bħal kuluri tal-qawsalla. Għax ħajtek kollha mhux ħlief tħabbat rasek Max-xejn, fix-xejn li lilek qed jisfida Biex toħloq logħoba ġdida u b’hekk idderri. F’għajnejn il-baħħ trid tħares bi qlubija. Qlubija! Dak li jgħodd. Ma jgħodd xejun aktar. Għax il-qlubija ssawwar kull tifkira U tkun l-isfida r-rahan ta’ ħajja mdaqqsa. Mill-bqija m’għandek xejn, arloġġ itektek U l-baħħ li qed ittawwal mir-rewwieħa.   Alfred Grech 21/09/2021

  196.   G ħ anni, g ħ anni kemm ti f la ħ , xejn la tibza’ , Ma jibqa’ xejn għajr l-għanja illi tgħanni, Li tferraħ għal fit ħin, imbagħad tintesa’, Bħal kif fil-kors taż-żmien kulħadd jintesa’. Għanni, għaliex  għal dakil-waqt li tidwi l-għanja Tkun tferraħ qalb ta’ min jisimgħek tgħanni, Imqar jekk ma jifhimx dak li trid tfisser, Inkella ma jarax il-wiċċ imbikkem Mistoħbi wara l-maskra li trid tilbes Saiex bħal buffu ġġedded terġa’ l-ħrafa Li l-bogħod mis-swied il-qalb, il-bogħod mid-dieqa Hemm ġenna fejn jimirħu l-innoċenti, Li l-għanja tista ddum mhux għal waqt wieħed . . . Hemm art fejn nibqgħu tfal, qatt ma nixjieħu.   Alfed Grech 20/09/2024.

  Imqar jekk Tibqa’ Ma Tiddix.   Imqar jekk tibqa’ ma tiddix Int kewkba f’galassija U t-trieq minn qalb id-dlam etern Imxejtha kemm il-darba.   Twelidt kometa tiddi Iġġor l-aħbar it-tajba Kull darba tgħaddi sbrixx U ddur bla ma titfarrak.   Imqar jekk ismek ma jibqax imnaqqax Fiż-żonqor ta’ l-istorja Sehemek għamiltu dejjem Esploratur tal-elusiv.   Għalekk la tistaqsix Għal dak li seta’ kien Imbierek int mingħajr ma taf Imdawwar b’dijadema.   Alfred Grech 17/09/2024

  Għaliex Qed Tistaqsini?   Għaliex qed tistaqsini Tweġiba jien m’għandix? Xħin l-ajru jissaħħab Is-sema m’għandux tmiem. Hemm qalbi tiżżeffen Fil-wileġ tat-tifkiriet Fejn xuxtek iddellel Ir-riħ li jrid jeħles Il-friegħi tas-siġar Min-nida. Għajjiena l-mixja tiegħi Fuq ċpar in-nostalġija. Tinsiex li aħna wqajna Fil-muta x’ħin ġejna Biex naqsmu l-oċean. Imbagħad  inti sparixxejt U ħallejt warajk id-diwi. Tibżax, jien issa nibda ntir Mingħajr ma nrabbi l-ġwieneħ.   Alfred Grech 14/09/2024.

  L-Għanja Eterna.   L-arja tqila trid twelled il-qawsalli Iżda żmien il-ħsad hu wisq il-bogħod Hemm togħma fl-umdita’ li toqtol kull tqanqila U kull darba nsib ruħi F’salib it-toroq Hekk toħroġ it-tnegħida tal-imgħoddi Li l-għannej irid iwassal għal tul l-eternita’ Nistħajjel illi fl-għabex ta’ jum itwal Ħaddieħor joħlom biss fejn kellu jasal.   Ġo ħsiebi folla nies itterraq bla ma taf Fejn għad trid tasal.   Innaddaf in-nużżalki u nieqaf naħseb U kewkba tgħaddi sbrixx bla ma tolqotni.   Alfred Gech 12/09/2024.

  Għaliex.   Għaliex il-ġilda qed tbiddel il-lewn, t-taħbit tal-qalb mar-rimu tal-ħsibiejiet U kollox jidher qisu F’salib it-toroq?   Għaliex il-baħar na jirriflettix Is-sema U xħin inħares f’għajnejk Inkun inħares lejn ix-xefaq?   Jien nara lili nnifsi Fi nżul ix-xemx U ħafna nemel Iterraq ġewwa qalbi.   Alfred Grech 11/09/2024.

  Solitudni.   Din hija solitudni tal-iktar sajf sħun Deżolazzjoni ta’ xemx f’mergħat ir-ruħ Din hija solitudni tal-eżistenza Li tiswa’ daqs in-ngħas li jibża miż-żenieq Insett li għadu ma ħariġx mill-fosdqa U jaħseb li kull ilma sar misħun Ta’ moħħ illi jintebaħ b’dak kollu Li għad iseħħ Vleġġa li tgħaddi mit-toqba Ta’ muftieħ l-eternita’ U l-mera li qed tistenna Li tkun żverġnata Taħt is-siġra ta’ ġnien Fejn l-imħabba għad triq tgħix.   Alfred Grech 08/09/2024.

  F’Għajnejk.   F’Għajnejk ix-xefaq ta’ ħolm imbiegħed It-tarf tar-realta’ bla tmiem, It-toroq illi jwasslu għall-eżilju Id-dell ta’ min ma jażżardax.   F’dirgħajk il-waqfa ta’ min għadu jaħseb U fuq ħaddejk il-ward ta’ Ġnien il-Għeden Il-qtar tad-dmugħ li għad xi darba jwassal Fil-bir illi l-imħabba ma jesgħax.   Minn din it-triq irridu ngħaddu Sa mmissu it-torri tal-ivorju Fejn toqgħod int ixxejjer mill-gardjola Biex tqawwi l-qalb ta’ pellefrin.   Alfred Grech 07/09/2024

  Orizzonti.   Oriżżonti ta’ bla tmiem Li f’ġufhom irrid nindifen Biex nirxoxta mill-ġdid Awtronawta t’elf mitt kewkba.   F’għajnejk l-iġfna ta’ tamietna Qed isalpaw, imma Jien dan il-vjaġġ għamiltu kemm il-darba.   Irrid xintilla biex tqajjimni Minn dan in-ngħas . . . In-ngħas tal-indifferenza.   Fil-wesgħat tal-wileġ bla tmiem Ilmaħt il-mewt miexja Imbagħad ma sibt ebda ħarieġa Li magħha stajt inqabbad Xħin bdejt niżżerżaq lejn l-abbiss.   Għajnejn bla xefaq jroxxu qtar tad-dmugħ Isaqqu l-foresta tagħna Tad-dnubiet oriġinali.   Imbagħad minn fuq is-swar tal-tifkiriet Narak qed ixxejjirli.   Jekk fl-aħħar ta’ dal jum Niktiblek poeżija M’hemmx prezzha din il-mixja.   Alfred Grech 05/09/2024.  

  Irrid Inrabbi l-Ġwienaħ u Nittajjar.   Irid inabbi l-ġwienaħ u nittajjar U nogħla ’l-fuq fis-sema ’l-fuq mis-sħab U nibża’ nħares l-isfel għax hemm isfel Inkun il-pellegrin  mill-ġdid tallab.   Irrid intir fuq sħaba sabiex ninsa’ ’L-hemm isfel hemm id-dlamm hemm biss l-abbiss U nagħmel ta’ bir-ruħi sirt tajr’oħra Biex nibqa’ ntir il-fuq u ngħanni biss.   Irrid insegwi l-leħen li jsejjaħli U nħares l-isfel żgur li ma nerġgħax Lejn purċissjoni nemel dejjem jaħsen Għax ħlief ġmieħ u ġiri ma baqax.   Alfred Grech 04/09/2024.