Tajr Tal-Karti

  Min Hi Dir-Ruħ?   Min hi dir-ruħ li llum ma tridx tħallina, Trid tibqa’ hawn titbandal tiela’ u nieżla’ Ma mewġ il-baħar bla ma taf fejn sejra? Għaliex trid tkompli tterraq f’din il-mixja, F’deżert battal, f’deżert mingħajr oasi, Xefaq bla tmiem, siparju jisparixxi? Għaliex trid tibqa’ tqum ta’ kull filgħodu U tara daqshekk ċar: trid terġa’ tidħol Fil-qalba tad-duħħan fil-baħħ tal-ħajja Fid-dlam ta’ din il-ġrajja bla ġejjieni? Aħjar ma tħarisx lura u ġġor miegħek It-toqol li ġġib magħha kull tifkira, Biex hekk ma tkun tlift xejn , għax ħafna drabi Aħna l-bnedmin qiegħdin iż-żifna niżfnu Ta’ min ikun iħallas lid-daqqaqa.   Alfred Grech 26/02/2025.

  Jekk Tiġi Biex Ittajjar.   Jekk tiġi biex ittajjar l-isbaħ tajra U ssib li riħ m’għandekx u l-arja tqila, Issib li mqar id-dgħajsa fuq ix-xtajta Imdawwra b’ħafna tfal jistaqsu ’l-għala.   Jien kont intik rigal imqar il-baħar, Inkella f’dad-deżert it-tnejn niltaqgħu U bħal viljakk bl-iskuża tal-imħabba Nonfoħ weraq l-uġiħ f’wiċċ it-tifkira.   Alfred Grech 25/02/2025

  Kont Ħsibt.   Kont ħsibt li sirt pis ieħor fuq spallejja, Sakemm   ġejt hawn insellem it-tluq tiegħek, U sibt li qed tgħattiħ id-dawl t’għajnejjja U lura mort fit-toroq tat-tifkira.   Kont ħsibtek ġebla tqila biex terfagħha Tagħbija illi qatt ma kienet tiegħi, Sakemm il-vrus bdejt nikteb biex ngħannilek U sibt li dan ma kienx għajr ċpar li jgħaddi.   Kont ħsibt li kelli pjan li ridt infassal U inti kont ix-xkiel li qed jankrani, Sakemm imbagħad ħassejt il-qawwa tiegħek, U bdejt bil-ftit il-ftit tgħib u titbiegħed.   Alfred Grech 24/02/2024.

  MA nafx Jekk Għadekx.   Ma nafx jekk għadekx magħna nkella tlaqtna, M’għedtilna xejn, u lanqas trid issellem. Sirt bħal peota tlift il-kliem u l-għana, Itterraq f’nofs desert ma tafx fejn sejra.   Jien ma nemminx li kollox għadda u telaq, Jien ma nemminx li l-lejl se jibqa’ għal dejjem. . ., Is-skiet tiegħek nimlieħ bil-kliem u l-għana, F’dil-ħolma bejn il-qtiegħ il-qalb u t-tama.   Alfred Grech. 23/02/2025.

  Jekk Mhux Illum.   Jekk mhux illum titħalla għal darb’oħra, Jum wara jum   titilgħu dal-kalvarju It-telgħa tas-salib li m’hemmx li tgħaddi U għal ħaddieħor tkun l-għelm tal-imħabba.   Jekk mhux illum titħalla għal darb’oħra Ittawwal tista’ biss u mhux jitwarrab, L-appuntament   li ħadd ma jaħrab minnu Imqar jekk mhux fil-waqt li tkun tistenna.   U għadna ma nafux jekk din hix logħoba Inkella jekk tassew hux vjaġġ li jgħaddi, Drajniha   wisq dil-logħoba mistoħbija U m ngħarfux is-sens tal-apparenza.   Alfred Grech 20/02/2025.

  Lil Ommi.   Int issa sirt  bħad-dell li jiġri w’rajja Ma nafx jekk tkunx tifhimni jekk inkellmek Fi nżul ix-xemx fejn kollox isir itwal, Bħal-leħen li jfesfisli ġo widnejjja U sewwasew ma nafx xi tkun qed tgħidli.   Int issa sirt bħall-għana tal-għasafar Fi sbieħ il-jum ta’ ħolm li mank jitwemmen, Is-skiet li jsemma leħnu fis-sbuħija U fl-istess waqt iġorr il-pis tal-ħajja.   Inħoss it-telfa tiegħek u għadek magħna Imqar jekk ma kienx baqa’ xejn xi ngħidu; Int issa sirt bħar-riħ li jġorr il-weraq, U l-leħen ta’ min dejjem jgħid is-sewwa.   Alfred Grech 19/02/2025

  Jekk Int Terġa’ Ssejjaħli. Jekk int terġa’ ssejjaħli mhux se nwieġbek Għax kelli mmur malajr mingħajr ma nsellem, Bħal leħħa dawl li tolqtok u tbiddillek Id-direzzjoni, il-kors tal-ħajja tiegħek. Nixieq li kieku għandi xi twiddiba Nibgħatlek bewsa illi tmiss lil-qlabek Li ttaffi t-togħma qarsa u tisfida l-assurdita’ ta’ ħajja desolanti. Bħar-rix fir-riħ il-kliem li tkun ħallejtli U leħnek jibqa’ jħabbat b’ritmu mistħi, Il-ħin bħax-xemx li titla’ bla ma tinżel Ma jiswa’ xejn li terġa’ ġġibni lura.   Alfred Grech 19/02/2025.

  Kliemek.   Kliemek, Imqar jekk ming ħ aj r ħ sejjes Jien nismag ħ hom.   Kliemek Imqar jekk int ma tafx Jipnoti żż awni U nibqa’ ħajti kollha Imsaħħar.   Arani, Bdejt ninħall Nintilef f’oċean Tat-tifsir li jien biss naf.   Imqar jekk kull m’għamilt Kien biss li ksejt misteru B’yikketta ġdida.   Alfred Grech 17/02/2025

Jiżolqu  Bejn Is-Swaba.   Jiżolqu minn bejn s-swaba Il-kwiekeb li jdubu fi sbieħ il-jum Li kieku kelli l-kiem kont nagħmel sfida Iżda s-skiet imdawwar miegħi bħal liżar. Jekk jiena nitboq fommi nisma’ lilek Bħal diwi li jirbombja ġewwa moħħi. Bħal friefet li jitolbu li jimirħu Dak kollu li trid taf mill-fosdqa joħroġ. Kliem jiena m’għandix Biex jifqgħu bżieżaq t’arja fuq wiċċ l-ima U dak li trid tkun taf Mhux ser tkun tafu.   Alfred Grech 15/02/2025

  Trid Taħfirielu Dil-Kundanna.   Kuljum iħoss il-pis ta’ dil-kundanna, Tbenġil li ma jfiq qatt, ġrieħi miftuħa, Uġiħ li jbejjet trejqa il-memorja U jibqa’ jġorrha miegħek sa ma ttemmu.   Trid taħfirielu; trid toħorġu minnha, Teħilsu darba għall-dejjem minn dal-ktajjen. Int ħlaqtu bex igawdi mhux biex jisħet Dak il-jum li fih beka għall-ewwel darba.   Ħalli l-imrar jinħall fiż-żlieġ tax-xita U qalbu terġa’ ssib is-sliem u l-paċi, Jerġa’ jmiur lura, mill-ġdid jitwieled jerġa’ Eħilsu darba għall-dejjem mill-kundanna.   Alfred Grech. 15’02/2025

  Ma Nafx X’Qed Taħseb Inti.   Ma naf x’qed ta ħ seb inti . Ħsibijieek Bħal kwiekeb li qed jimxu u qed jitbiegħdu. Int tiddi f’univers fejn jien qed negħreq Jew tfesfes il-misteri ġo widnejja.   Is-skiet qed jirrakkonta l-ġrajja tagħna, Tal-baħħ fejn tista’ ssib il-kewkba tiegħi, Għalhekk taħt dan is-sema ta’bla kwiekeb Nistaqsi sewwasew int x’qiegħda tara.   Jiena naf biss li qiegħda wara l-kwinti Naf biss li fuq xuftejk hemm it-tnissima Li taqbel mal-irtokk u dak li tilbes Marsus sabiex ifisser int min inti.   Alfred Grech 09/02/2024.

  Nitkellem Fis-Silenzju Qed Jitkaxkar.   Nitkellem fis-silenzju qed jitkaxkar Bħan-nida li titgeżwer ma subajja Il-ħsieb isejjaħ iżda xofti rieqda U l-leħen jibqa’ lsir tar-rieda tiegħi.   Inħażżeż l-arja b’linji ta’ sieket ħieles Mitluf bejn   spażju u ħin ma nafx fejn sejjer Kull kelma saret diwi qed jirbombja Kull sillaba bħal mażra mdendla m’għonqi.   Alfred Grech 08/02/2025.

  Kif Ma Ntbaħniex?     Kif ma ntbaħniex li aħna qisna dgħajsa Bla tmun, bla qlugħ ninġarru mal-kurrenti? Kif ma ntbaħniex bit-tarf tal-preċipizzju U bqajna għaddejjin ilkoll assenti?   Kif ma ntbaħniex li huma paralelli Kull univers li fih flimkien terraqna, Ma kien hemm xejn ta’ xkiel li seta’ jżommna, U mmorru nerġgħu lura minn fejn tlaqna?   Kif ma ntbaħniex kull darba li s-sinjali Bdew jidhru ma kull xaqq u konsentura? Imqar il-fewġa kiesħa f’nofs ottubru Bdiet tfesfer ġo widnejna l-konġuntura.   Matul iż-żmien misluf flimkien imxejna Bl-amment fuq art qed timxi taħt saqajna, Diġa’ bdiet nieżla x-xema imm’aħnan ħsibna Li l-lejl ma jasal qatt u nimxu bqajna.   Ilkoll rajnieħ il-baħar qiegħed jofroħ U d-dawl minn fuq ix-xefaq isejjħilna, Imm’aħna xorta waħda bqajna niżfnu Iż-żifna illi żifnu ta’ qabilna..   Kif bqajna bla ma ntbaħna li l-imħabba Ma twarrab qatt fi qlub fierħa u battala, Li s-swar li biex jirfduna konna bnejna, Spiċċaw ħabs tagħ...

 Li Kieku Stajt. Li kieku stajt ninbidel u nsir anġlu U nibda ntir ’l-fuq mis-sħab tas-sema Nintilef f’xi illużżjoni jew xi ħolma U nidħol fuq il-ponot ta’ subgħajja F’moħħok u l-ħsieb tiegħek nisseduċi. U jista’ jkun ma nsibx il-kliem li jogħla U jitla’ ’l-fuq mis-sħab, imma bħal gawwi Nittajjar kontra r-riħ u nerġa’ lura. U jien li nistaqsik u rrid nisimgħek Niġri warajk għax naf li hemm dinja oħra F’tinwieħ ir-riħ u l-aħħar mess tal-kordi. Alfred Grech 01/02/2025