Għaliex In-Nar Intefa’

 

Għaliex in-nar intefa’ meta stajna

Bil-ħeġġa nġorru t-toqol tul it-triq

Buffura ma kienetx u lanqas berqa

L’għamietna jew waqfitna f’nofs ta’ triq.

 

Xi jmewwet lil dir-ruħ li tibqa’ tfittex

Minkejja li għalqilha wkoll iż-żmien;

U qatt ma ħabblet rasha x’jiġri l-għada

U qatt ma sabet niċċa fejn tistrieħ?

 

Għax issa lanqas ngħid li ż-żmien kien għadda

Inkella li ma nafx jew m’għandix ħin,

Irrid indarri lil nnifsi ngħix mingħajrkom

U l-ħolm li dejjem ħlomt għal ħafna snin.

 

Alfred Grech

17/03/2026