Requiem Lil Rita.

 

Sibilha int Mulej il-post fil-ġenna

Il-post li jixirqillha ta’ruh tajba

U ara li tkun int li tistenniha

Wieqaf fil-bieb il-kbir b’idejk miftuħa.

Int taf Mulej fiż-żmien li għamlet magħna

Għaddietu l-wied tad-dmugħ u mxiet triqitha

Bla ħarset ’l hemm jew ’l hawn ’mma baqgħet dritta

Biex twettaq ma kull pass ir-rieda tiegħek.

Lil din ir-ruħ li ġejja tgħammar miegħek

Ħalliha tidħol dritta bħal reġina,

Hekk biss isir il-ħaqq ma din il-mara

Hekk biss hemm it-turija fit-tpattija.

Għax sehemha tagħtu sew kemm damet magħna

Għaliex il-purgatorju kien f’ħajjitha.

 

Alfred Grech.

12/03/2025.