Il-Mixja tas-Sonnamboli.

 

Lejn tarf l-irdum resqin bla ma nintebħu,

Għajnejna miftuħin, deħlin għaliha;

Mixjin reqdin bla nafu fejn se naslu,

Bit-tama li fil-bogħod hemm l-art imwegħeda.

 

Irrid reġistru kbir għal dawn in-numri

Ta’ r-rjus u tal-uċuħ li dejjem jikber

Tan-nies li jiffullaw it-toroq tagħna,

Tal-bini li bla rażan qed iħarbat

Il-beraħ kristallin ta’ dawn il-ġżejjer,

Tal-pjazez iffullati u toroq fgati

B-imwejjet siġġijiet mank tista’ timxi

Imbagħad issib li lanqas art ma fadal

Fejn tista’ tmidd riġlejk jew tippassiġġa.

 

Bħan-nemel nimxu wieħed wara l-ieħor

Fis-saltna tas-sonnamboli noħolmu

Ħolm ikraħ, ħolm imħawwad taħt xemx tisreġ

Bla nqisu jekk jiflaħx din it-tagħbija

Is-saqaf li xi darba għad iċedi.

Ikun jeħtieġ fotografu li jiġbed

Ritratt ta’ dal kollass spettakolari,

Resqin, mexjin flimkien deħlina għaliha

Mexjin wara min kliemu hu nixxiegħa

Wegħediet li ma jseħħux, bżieżaq jinfaqgħu,

Reqdin mexjin u ssib lill-min jippriedka

Iż-żieda u t-tkattir fil-ġid tal-kotra

Ta’ Hamelin dan hu d-daqqaq tal-fifra.

 

Il-ħmar il-lejl mhux biss ta’ min imexxi

Jinsab ukoll fl-imsieraħ u fit-toroq

Għax illuppjata l-kotra ta’ bla leħen

Li lanqas għada tgħaraf lilha nfisha

Galiex inqabdet hija wkoll fix-xibka

Ta’ rqad li ġġib il-globalizzazzjoni.

 

Alfred Grech

03/07/2024