Gehinnom.

 

M’hawn l-ebda ġenna f’dan l-ispazju

Batut u iffullat bil-liġijiet u n-numri

Konflagrazzjoni ta’ nirien il-firda.

M’hawn l-ebda warda li twarrad u tmut fid-dell

Tal-bini għoli wild il-logħob bl-imħuħ

U xogħol ta’ bla fejda.

Għax hekk riedu it-titani li belgħu saħansitra l-gebel

U rrimettew l-allat.

Id-duħħan taraħ biss

Meta naħarqu fuq il-miżbla

U ċ-ċpar ta’ filgħodu jgħib

Xħin toħroġ kristallina

ix-xemx minn wara x-xefaq.

Sidri kamp tat-taqbida

għajnejja għadira dmugħ

u sirt ma nagħrafx jum mil-lejl,

qed negħreq fil-baħar tax-xewqat

u ngħanni bħar-riżinjol.

Imqar id-dawl issa ndifen

Taħt il-ħsejjes tal-inġenju

Stampat fuq il-qatran tat-toroq

Inkella fil-konkrit tal-bini għoli.

Il-kotra titħawwad fl-ispazju mudlam

Tal-irħula maħnuqa u fgati

Ikun jonqos biss

Tfarfira tal-qtar tal-ilma mbierek

Minn fuq xfar l-għajejn.

Fi sbieħ il-jum, ix-xemx tistaħaba bil-mistħija

Tal-oxxenita ta’ bini bl-addoċċ

Taħt l-uċuħ iltiema ta’ kull għamla u ta’ kull lewn

Fuq palk mistħajjel għax għandom il-barka

Tal-allat ta’ bla ħila

Li sehemhom hu li joqgħodu

Fin-niċċa tagħom

Fil-panteon ta’ olimpu

 

Alfred Grech

06/07/2024