San Dimitri.

Talbitek dik żgugina u inti smajtha

Fit-tħaxwix tal-ħuxlief tal-busbież u x-xurbebb.

Intilef is-sens ta’ dal-ħaġar

Li darba kien id-dejr tal-allat foloz

Jew tal-ġiganti.

Liema qanpiena sejra tisraq

Is-skiet imdemmi tax-xemx qed tbatti;

Il-ħsejjes tal-moħriet?

It-tperspis tal-għasafar?

Min ħolom fl-għera ta’ dawn l-inħawi

Li jibni dan il-maqdes

Ma kienetx xi mara għawdxija

Iżda xi ħadd li wegħeda tiegħu twettqet.

Min ħarsek mill-qilla tal-irwiefen

U l-kamla taż-żmien?

Kien il-miraklu tat-twemmin

Ta’ nies bla ħjena.

U l-għadu tiegħek mhuwiex iż-żmien

Iżda s-susa li qed tgerrem

Il-qalb għawdxija.

Hawnhekk int tpaxxi l-għajn

Lilhinn mill-ispazji miftuħa.

San Dimitri jekk għandek terġa’ tiġi

Tħallix id-difer ta’ żiemel fil-blat

Iżda ħuġġieġa ta’ fidi dejjiema

Ta’ tama u ta’ mħabba ta’ mara raħlija.

Imqar jekk il-qanpiena ddoq

U mhemmx min jisma’

 

Alfred Grech

28-06-2024.