Paraliżżat.

 

Paraliżżat f’dil-wesgħa bla kofini

Bħal baħri taqdef waħdek f’baħar sielem;

Ir-raxx ibewwes wiċċek bl-ilma mielaħ

Ma tismax aktar l-għanja tas-sireni.

 

Trid terġa’ tħares lura u tibda tgħoddhom

Il-jiem l’għaddejt fin-ngħas u l-letarġija,

U taħbi trid minn sħabek il-qalb sewda

U tagħmel ta’ bir-ruħek l’għadek miexi.

 

Inkella terġa’ tibda tgħanni l-għanja

Mifruxa l-melodija qalb il-wileġ

Li darba kont tgħallimt fi Ġnien il-Għeden

Ta’ qlub li jiggranfaw mal-ajru mbikkem.

 

Id-dlam tal-lejl għalik sar sinfonija,

F’dan l-oċean battal tal-eżistenza,

U issa wkoll titkellem bdejt mal-kwiekeb

Biex tislet għad tweġiba għall-mistoqsija.

 

Alfred Grech

05/04/2024.