Iċ-Ċinju.

 

Tiżżerżaq fuq iż-żlieġa ta’ wiċċi l-ilma

Bi stil u tondjatiri mmakulati

Mhijiex biss tajra, iżda  wkoll l-għamara

Li ġġorr ġo ġufha dak li l-allat libsu

Lilhinn minn fejn iwassal kull konfini.

Zeus liebes ir-rix u l-isfel aktar jogħodos

Biex spiċċa fuq xtut Leda mhux imħarsa

Biex kebbes ħolqien ġdid mingħajr ix-xrara.

 

Ġwenħajha miftuħin bħal dawk tal-lira.

Hu mar iħażżeż triqtha f’sema għeri

Cygnus fiddien  għawwiem fi xmajjar qodma

Jiddi fuq rasna biex b’hekk niftakru nibqgħu

Li minn ġol qiegħ trid tibda kull titjira.

 

Tmattar għonqha bħal kienet mistoqsija

Tfittex fil-wiċċ u tobrox ħġieġ il-mera,

bejn dak li fil-fond jgħereq, li ’l-fuq jitla’.

 

Dan hu l-ħassieb li jilbes mantar abjad

u jsir dak li trid int, u li trid tara.

Il-grazzja ma tkun xejn, tkun biss il-gidba

Biex b’hekk il- Kaos jgħaddi u jerġa’ jibla’

Waqt wieħed biss ta’ ħemda fuq wiċċ l-ilma

Li jmiss hu stess bid-dell li jibqa’ miexi -

Tkaxkira ineżorabbli tal-kurrenti.

 

X’jispiċċa fir-rifless bajdan iaċ-ċinju?

Jispiċċa dak il-mit li s-sabiħ jibqa’.

Inkella l-verita’ li trid trid tinkiser

Biex jidher dak Ii hemm  fil-baħħ li jibla’.

 

Għax aħna niskantaw xħin hi titmattar

U ruħha terġa, tgħereq fis-silenzju,

Ma jibqa’ xejn, imwejjeġ li jitbiegħdu

U l-ħsieb li jifli biss l-abbiss ta’ dejjem.

 

Alfred Grech.

19/02/2026.