Għid Il-Kbir II

 

Dan mhuwiex Għid il-Kbir li nafu aħna,

Jirxoxta għalxejn is-salvatur tad-dinja,

Għax paċi m’hawnx u qatt mhu se ġib mieghu,

Jew paċi tkun tal-boloħ li joħolmu

U mhux ta’ min iwiżen l-armamenti.

 

Qabel kont nissaport t-tfiegħ tal-bombi,

Illum sibt li ttarraxt u ma rridx nisma’.

Qabel inħossu kont l-uġigħ tal-martri

Li jmutu mirdumin: illum inermi;

U kont inħoss għal min pajjiżu jħalli,

Stuprati n-nisa, tfal li sfaw weħidom

Jew mitlufin għax ħadd ma mar ġabarhom.

Illum sirt lanqas biss ma jimpurtani

Jekk naf li l-ħafna eluf ġew massakrati.

 

Kont aktar lest li nagħlaq ftit għajnejja

Għal min bis-saħħa jridha tgħaddi tiegħu.

Illum m’għadnix, għax dakinhar kont nemmen

Li n-nies tad-dinja tgħamlu darba’ għal dejjem

Mill-qirda u t-tbatija tal-konflitti

U ħalfu li l-istorja mhux se jtennu.

Iżda żbaljajt; erġajna morna lura.

U fhimt aħjar li kienu jgħidu dari:

Jekk inti tri il-paġi arma għall-gwerra.

 

Alfred Grech

13/03/2024